Cé sinne

Comhlacht poiblí neamhspleách a rialálann earnáil cíosa na hÉireann is ea an Bord um Thionóntachtaí Cónaithe (RTB). Oibrímid chun córas cíosa cothrom a chinntiú do gach duine in Éirinn.

Inár ról, déanaimid na nithe seo a leanas:

• Tionóntaí agus tiarnaí talún a chur ar an eolas faoina gcearta agus faoina bhfreagrachtaí
• A chinntiú go gcláróidh tiarnaí talún tionóntachtaí agus go gcloífidh siad leis an dlí cíosa
• Cabhrú le díospóidí tionóntachta a réiteach
• Sonraí agus léargais iontaofa a sholáthar chun bonn eolais a chur faoin mbeartas i leith na hearnála cíosa

Táimid tiomanta do sheirbhísí ardchaighdeáin a sholáthar a fhágann go bhfuil an earnáil cíosa níos cothroime agus níos éasca le tuiscint.

Rialálaimid gach ceann de na tionóntachtaí príobháideacha, de na tionóntachtaí Comhlachta Tithíochta Cheadaithe, de na tionóntachtaí ar cíos de réir costais, agus de na tionóntachtaí i leith cóiríocht atá sonrach do mhic léinn in Éirinn.

Oibrímid faoi choimirce na Roinne Tithíochta, Rialtais Áitiúil agus Oidhreachta.

Cad a dhéanaimid

Is cuid ríthábhachtach de mhargadh tithíochta atá ag feidhmiú go maith í earnáil cíosa fholláin. Tá ár gcuid oibre ina cuid lárnach den mhéid sin a bhaint amach do shochaí na hÉireann.

Gach bliain, déanaimid:

• Breis agus 300,000 ceann de thionóntachtaí príobháideacha, de thionóntachtaí Comhlachta Tithíochta Cheadaithe, de thionóntachtaí ar cíos de réir costais, agus de thionóntachtaí i leith cóiríocht atá sonrach do mhic léinn a chlárú.
• Díospóidí idir níos mó ná 9,000 duine de thiarnaí talún, de thionóntaí agus de chomharsana a réiteach.
• Feachtais chomhlíonta spriocdhírithe a reáchtáil chun a chinntiú go mbíonn tiarnaí talún ag cloí leis an dlí cíosa.
• Faisnéis faoin dlí cíosa a thabhairt do níos mó ná 500,000 cuairteoir ar ár suíomh Gréasáin.
• Ceithre nuashonrú ráithiúla a fhoilsiú ina dtugtar na sonraí is déanaí faoi staid earnáil cíosa na hÉireann.