Ráiteas Príobháideachta

An Bord um Thionóntachtaí Cónaithe

Comhlacht reachtúil atá freagrach as córas clárúcháin náisiúnta do gach tionóntacht chónaithe a oibriú, as seirbhís um réiteach díospóidí a oibriú, as ról rialála comhlíonta a oibriú, as faisnéis agus comhairle beartais araon a sholáthar, agus as taighde a chur i gcrích maidir leis an earnáil cíosa phríobháidigh (ach gan a bheith teoranta do na cúraimí sin) is ea RTB.

Is féidir leat tuilleadh faisnéise faoinár sainordú reachtúil a fháil faoi alt 151 den Acht um Thionóntachtaí Cónaithe, 2004, rud is féidir a rochtain ar an suíomh Gréasáin seo a leanas: http://www.irishstatutebook.ie

Is é RTB rialaitheoir sonraí na sonraí pearsanta a bhailímid fút, nó a bhailítear thar ár gceann fút, ar sonraí iad a bhaineann lenár bhfeidhmeanna reachtúla dá dtagraítear thuas.  Tá tuilleadh faisnéise faoi RTB ar fáil ar ár suíomh Gréasáin, rud is féidir a rochtain tríd an nasc seo a leanas a úsáid: Leathanach Baile

Reachtaíocht

Déantar na sonraí pearsanta uile a bpróiseálann RTB iad a phróiseáil de réir na ndlíthe Éireannacha um chosaint sonraí agus um príobháideacht is infheidhme, lena n-áirítear an Rialachán Ginearálta maidir le Cosaint Sonraí (‘RGCS’), an tAcht um Chosaint Sonraí, 2018, agus, i gcás gurb iomchuí, an Treoir maidir le Cosaint Sonraí i réimse Fhorfheidhmiú an Dlí (i gcás gurb infheidhme).

RGCS

Tháinig RGCS i bhfeidhm ar fud an Aontais Eorpaigh an 25 Bealtaine 2018. Ba é an toradh a bhí air gur neartaíodh na cearta atá ag daoine aonair agus gur méadaíodh na freagrachtaí agus na hoibleagáidí atá ar rialaitheoirí agus ar phróiseálaithe. Tá RGCS deartha chun tuilleadh smachta a thabhairt do dhaoine aonair ar a sonraí pearsanta. Is iad seo a leanas na príomhphrionsabail a bhaineann le sonraí pearsanta a phróiseáil faoi RGCS: dlíthiúlacht, cothroime agus trédhearcacht; teorannú de réir cuspóra; íoslaghdú sonraí; cruinneas; teorannú stórála; sláine agus rúndacht; agus cuntasacht (Airteagal 5 RGCS). In Éirinn, tugtar tuilleadh éifeachta do RGCS, i measc nithe eile, leis an Acht um Chosaint Sonraí, 2018.

An Treoir maidir le Cosaint Sonraí i réimse Fhorfheidhmiú an Dlí

Leis an Treoir maidir le Cosaint Sonraí i réimse Fhorfheidhmiú an Dlí, rialaítear an phróiseáil a dhéanann rialaitheoirí sonraí ar shonraí pearsanta, chun ‘críocha fhorfheidhmiú an dlí’, a thagann faoin míniú ar ‘údarás inniúil’.  In Éirinn, cuirtear an Treoir maidir le Cosaint Sonraí i réimse Fhorfheidhmiú an Dlí chun feidhme trí Chuid 5 den Acht um Chosaint Sonraí, 2018, go príomha.  Tá feidhm aige sin maidir le próiseáil a dhéantar:

‘(i) chun cionta coiriúla a chosc, a imscrúdú, a bhrath nó a ionchúiseamh, lena n-áirítear cosaint in aghaidh bagairtí do shlándáil an phobail, agus bagairtí do shlándáil an phobail a chosc, nó (ii) chun pionóis choiriúla a fhorghníomhú’.

In alt 69 den Acht um Chosaint Sonraí, 2018, mínítear ‘Údarás Inniúil’ mar ‘údarás poiblí atá inniúil chun cionta coiriúla a chosc, a imscrúdú, a bhrath nó a ionchúiseamh nó chun pionóis choiriúla a fhorghníomhú sa Stát, lena n-áirítear cosaint in aghaidh bagairtí do shlándáil an phobail, agus bagairtí do shlándáil an phobail a chosc’.

I gcás gníomhaíochtaí próiseála áirithe a dhéanann sé, is ‘údarás inniúil’ chun críocha Chuid 5 den Acht um Chosaint Sonraí, 2018, é RTB.  Dá bhrí sin, is leis an Treoir maidir le Cosaint Sonraí i réimse Fhorfheidhmiú an Dlí a rialaítear na críocha sonracha sin.

Ceisteanna agus Gearáin

Má bhíonn ceist, ábhar imní nó gearán agat maidir le ní cosanta sonraí nó má theastaíonn tuilleadh faisnéise uait faoin dóigh a n-úsáidfidh RTB do shonraí pearsanta, is féidir leat teagmháil a dhéanamh leis an Oifigeach Cosanta Sonraí:

An tOifigeach Cosanta Sonraí

Is í Clodagh Memery Oifigeach Cosanta Sonraí RTB.  Má bhíonn aon cheisteanna agat faoi chosaint sonraí, is féidir teagmháil a dhéanamh lenár nOifigeach Cosanta Sonraí le ríomhphost ag dataprotection@rtb.ie nó leis an bpost ag:

An Bord um Thionóntachtaí Cónaithe

Bosca PO 13841, Saorphost FKY7736, Cill Orglan, Co. Chiarraí.

Tá sé de cheart agat gearán faoin dóigh ar phróiseáil RTB do shonraí pearsanta a thaisceadh leis an gCoimisiún um Chosaint Sonraí ag info@dataprotection.ie

Is féidir leat teagmháil a dhéanamh leis an gCoimisiún um Chosaint Sonraí freisin, ag 6 Rae Pheambróg, Baile Átha Cliath 2, D02X963.

Sáruithe i ndáil le Sonraí Pearsanta

Déanfaimid gach beart teicniúil agus eagraíochtúil is cuí chun do shonraí pearsanta a chumhdach. I gcás gur féidir gur tharla sárú sonraí, déanfaidh an tOifigeach Cosanta Sonraí measúnú ar an sárú agus, bunaithe ar mheasúnú riosca, cuirfidh sé/sí RTB ar an eolas faoi na bearta atá le déanamh agus, más cuí, rachaidh sé/sí i dteagmháil le custaiméirí agus/nó leis an gCoimisiún um Chosaint Sonraí.   Má chreideann tú gur tharla sárú ar do shonraí nó má fuair tú sonraí pearsanta duine eile, déan teagmháil le dataprotection@rtb.ie

Cé na críocha a n-úsáidimid d’fhaisnéis chucu?

Déanaimid sonraí pearsanta a bhailítear a úsáid chun ár sainordú faoin Acht um Thionóntachtaí Cónaithe, 2004 (arna leasú), a chomhlíonadh, agus ar chúiseanna oibriúcháin i gcomhréir le rialú agus oibriú comhlachtaí poiblí.  Féadfaimid na sonraí pearsanta a shealbhaímid a úsáid chun aon chríocha acu seo a leanas:

Cé na críocha a n-úsáidimid d’fhaisnéis chucu?

Déanaimid sonraí pearsanta a bhailítear a úsáid chun ár sainordú faoin Acht um Thionóntachtaí Cónaithe, 2004 (arna leasú), a chomhlíonadh, agus ar chúiseanna oibriúcháin i gcomhréir le rialú agus oibriú comhlachtaí poiblí.  Féadfaimid na sonraí pearsanta a shealbhaímid a úsáid chun aon chríocha acu seo a leanas:

Conas a bhailímid faisnéis?

Bailímid sonraí pearsanta chun ár seirbhísí a sholáthar duit agus chun ár ndualgais rialála a chomhlíonadh, lena n-áirítear tionóntachtaí a chlárú, mar a cheanglaítear faoin Acht um Thionóntachtaí Cónaithe, 2004 (arna leasú).

Bailímid na sonraí pearsanta sin ónár gcustaiméirí ar gá dóibh tionóntachtaí a chlárú nó ár seirbhísí um réiteach díospóidí a úsáid.  Is féidir le custaiméirí an fhaisnéis sin a sholáthar trínár dtairseacha Gréasáin féinseirbhíse atá ar fáil ar www.rtb.ie nó trí chumarsáidí poist agus ríomhphoist.

Bailímid sonraí pearsanta ónár gcustaiméirí atá ag comhlíonadh na rialachán faoin Acht um Thionóntachtaí Cónaithe, 2004 (arna leasú), lena n-áirítear Fógraí Foirceanta, Fógraí faoi Shocrú Cíosa, Fógraí faoi Athbhreithniú Cíosa agus Fógraí Rabhaidh a chur isteach, ach gan a bheith teoranta dó sin.

De ghnáth, cuirtear na foirmeacha sin isteach trí shuíomh Gréasáin RTB ach is féidir iad a fháil leis an bpost.

Agus muid ag comhlíonadh na feidhme rialála atá againn imscrúdú a dhéanamh ar iompar míchuí tiarnaí talún mar atá leagtha amach i gCuid 7A den Acht um Thionóntachtaí Cónaithe, 2004 (arna leasú), féadfaimid sonraí a bhailiú ó raon foinsí, lena n-áirítear ábhair sonraí eile, comhlachtaí poiblí agus cuideachtaí príobháideacha.

Agus muid ag saothrú ár bhfreagrachtaí as neamhchlárú a fhorfheidhmiú trí alt 144 den Acht um Thionóntachtaí Cónaithe, 2004 (arna leasú), féadfaimid sonraí pearsanta a bhailiú ó thríú páirtithe a thuairiscíonn neamhchlárú amhrasta agus féadfaimid sonraí ceadaithe eile rialtais a úsáid (e.g., sonraí Íocaíochta Cúnaimh Tithíochta ón Roinn Coimirce Sóisialaí)

Féadfar sonraí pearsanta a bhailiú go díreach trí fhoireann RTB, trí shuíomh Gréasáin RTB, agus trí aon fheidhmchláir a úsáidimid.  Féadfaimid sonraí pearsanta a fháil freisin trí chomhlacht poiblí eile a bhfaighimid sonraí uaidh go dleathach.   Mar shampla, an Roinn Coimirce Sóisialaí agus an tAmharc Custaiméara Aonair. Féadfaimid sonraí pearsanta a fháil freisin ó dhíoltóirí a oibríonn linn trí oibriú a gconartha.  Féadfaimid sonraí pearsanta a bhailiú ó dhaoine nach fostaithe de chuid RTB iad trínár bhfeidhm acmhainní daonna agus earcaíochta a oibriú.

Agus tú ag dul isteach inár n-áitreabh, is féidir go dtaifeadfar thú ar fhaireachas TCI agus ar an leabhar loga cuairteoirí (síniú isteach/amach) chun críocha slándála.

Ar shuíomh Gréasáin RTB, úsáidtear fianáin áirithe lena mbailítear sonraí faoin dóigh a n-úsáidtear ár suíomh Gréasáin. Is féidir ár mBeartas maidir lenár Suíomh Gréasáin agus le Fianáin a rochtain anseo.

Faisnéis Mhíchruinn a Soláthraíodh do RTB

Tá sé tábhachtach gur cothrom le dáta agus cruinn atá an fhaisnéis a sholáthraíonn tú do RTB. Más míchruinn nó neamhiomlán nó as dáta atá na sonraí pearsanta atá faighte againn uait, is féidir nach mbeimid in ann seirbhís a sholáthar ná teagmháil a dhéanamh leat.  Is ceanglas dlíthiúil é gur cruinn tráth a sholáthraítear iad atá na sonraí go léir, lena n-áirítear sonraí pearsanta, i gclárú agus go gcoimeádtar cothrom le dáta iad.

I gcás go gcuirfear RTB ar an eolas faoi shonraí a d’fhéadfadh a bheith bréagach nó míthreorach, déanfaimid bearta cuí chun an méid sin a cheartú.

Cén cineál faisnéise a bhailítear?

Chun ár n-oibleagáidí reachtúla a chomhlíonadh agus chun na seirbhísí a thuairiscítear sa Ráiteas Príobháideachta seo a sholáthar, bailíonn agus próiseálann RTB raon sonraí pearsanta. Cé gur féidir leis na cineálacha sonracha faisnéise a mbailíonn RTB iad athrú ó am go ham, creideann RTB go bhfuil sé tábhachtach na catagóirí sonraí pearsanta a bhailíonn agus a úsáideann sé de ghnáth a leagan amach.

Coinneoimid do shonraí pearsanta chomh fada agus is gá chun na críocha ar bailíodh iad chucu a chomhlíonadh mar a thuairiscítear thuas agus i gcomhréir lenár n-oibleagáidí dlíthiúla agus rialála.  Áirítear iad seo a leanas leis na critéir a úsáidimid chun tréimhsí coinneála sonraí a chinneadh le haghaidh sonraí pearsanta:

Coinneáil i gcás ceisteanna: Féadfaidh RTB sonraí pearsanta a choinneáil ar feadh tréimhse réasúnach tar éis dheireadh ár gcaidrimh leat chun aon cheisteanna leantacha a fhreagairt.

Coinneáil i gcás éilimh fhéideartha: Féadfaidh RTB sonraí a choinneáil ar feadh an fhaid a bhféadfaí éileamh a dhéanamh lena linn. Is féidir go mbeidh sé sin suas le deich mbliana i gcásanna áirithe.

Coinneáil chun oibleagáidí dlíthiúla nó rialála a chomhlíonadh: Féadfaidh RTB sonraí pearsanta a choinneáil ar feadh sé bliana, i gcomhréir le Reacht na dTréimhsí, agus is gnách go dtosaíonn an tréimhse coinneála sin tar éis dheireadh an cháis nó tar éis dheireadh na tionóntachta.

Coinneáil faoin Acht um Chartlann Náisiúnta: Ní mór taifid áirithe a chaomhnú chun críocha stairiúla nó cartlainne i gcomhréir lenár n-oibleagáidí dlíthiúla.  Fágann sé sin go ndéanfar na taifid a gceanglaíonn an Chartlann Náisiúnta ar RTB iad a choinneáil a aistriú chuig an gCartlann Náisiúnta tar éis 30 bliain ar bhonn rollach.

Is liosta neamh-uileghabhálach é an tábla seo a leanas agus tugtar léargas ann ar na catagóirí sonraí pearsanta agus na cineálacha sonraí pearsanta a úsáidimid chun ár ndualgais a chomhlíonadh, agus ar na tréimhsí coinneála iomchuí.  Féadfar faisnéis a bhailítear faoi chatagóir amháin a úsáid chun cúram a chur i gcrích i ndáil le gníomhaíochtaí faoi chatagóir eile.  Féadfar an tréimhse coinneála a fhadú má bhíonn caingean dlí i gceist.

Catagóirí Speisialta Sonraí Pearsanta a Phróiseáil

I gcás go bpróiseálaimid sonraí catagóire speisialta chun aon cheann de na críocha a shonraítear thuas, ní úsáidfimid an fhaisnéis ach amháin chun na feidhmeanna seo a leanas a chomhlíonadh:

• Mar chuid d’imeachtaí dlí, d’imeachtaí imscrúdaithe, agus smachtbhannaí, nó d’imeachtaí um réiteach díospóidí.

I gcás go bpróiseálaimid catagóirí speisialta sonraí pearsanta, ní dhéanfaimid amhlaidh ach amháin chun oibleagáid dhlíthiúil a bhfuilimid faoina réir a chomhlíonadh agus sainaithnímid aon chatagóirí speisialta féideartha sonraí atá á n-eisiúint chuig RTB, trínár dTaifead ar Ghníomhaíochtaí Próiseála (ROPA).

Sonraí Pearsanta Leanaí

Is féidir go bhfaighimid sonraí pearsanta leanaí tríd an tseirbhís um réiteach díospóidí.  Is féidir leis sin tarlú ar bhealaí éagsúla.  Is féidir go n-eiseoidh tionónta grianghraf dá gcóiríocht ar cíos, agus is féidir go mbeidh leanbh sa ghrianghraf sin.  Molaimid do gach páirtí in aon díospóid gan íomhánna den sórt sin a sheoladh, nó aghaidh an linbh a chlúdach.  Is féidir go bhfaighimid sonraí leanaí freisin i gcás go bhfuil díospóid ann, agus is féidir go ndéanfar tagairt do leanbh nó go dtabharfaidh sé/sí fianaise.  Déanfar ainm gach linbh a fholú ó aon tuarascáil Binse a fhoilseofar, mar bheart nós imeachta.  De ghnáth, ní thabharfar ról do dhuine ar bith faoi aois i gcás díospóide, ná ní bhfaighidh sé/sí aon doiciméid den sórt sin.

Trí Chóiríocht atá Sonrach do Mhic Léinn a chlárú, is féidir go mbeidh roinnt de na ceadúnaithe/na tionóntaí bhun 18 mbliana d’aois.  Má thagann díospóid chun cinn, glacfar nósanna imeachta cuí má tá an duine sin faoi bhun 18 mbliana d’aois.

Cé leis a gcomhroinnimid sonraí?

D’Ionadaithe

Is féidir go n-áireofar leo sin aon pháirtí ar thug tú cead dúinn teagmháil a dhéanamh leis/léi (amhail neasghaol nó céile), ionadaithe a bhaineann le do thionóntacht (amhail ionadaithe dlíthiúla nó gníomhairí a bhfuil baint acu le do dhíospóid), nó tríú páirtithe eile atá bainteach leat (amhail cuideachtaí bainistíochta ligin).

Ár nIonadaithe

Is féidir go n-áireofar leo sin ionadaithe RTB amhail fostaithe, gníomhairí, conraitheoirí, ionadaithe dlíthiúla, Bord RTB agus a choistí.  Is féidir go n-áireofar lenár n-ionadaithe freisin cuideachtaí a sholáthraíonn seirbhísí i ndáil le hearcaíocht, le seirbhís do chustaiméirí, le postas, le stóráil agus cartlannú sonraí, le TF agus slándáil TF, le híocaíochtaí a dhéanamh agus a fháil, le hairgeadas, le hanailís sonraí, le fógraíocht, le bainistíocht fiosruithe agus gearán, agus le dearbhú cáilíochta glaonna.

Comhaltaí Painéil Neamhspleácha agus Cinnteoirí Neamhspleácha

Comhroinnfimid cáschomhaid agus sonraí pearsanta gaolmhara le hidirghabhálaithe, le breithneoirí agus le comhaltaí binse atá neamhspleách ar RTB.  Tá comhaontuithe i bhfeidhm ag RTB leis na hoifigigh sin i dtaca le do shonraí pearsanta.

Tríú Páirtithe Eile

Tríú páirtithe chun ár bhfeidhm a chomhlíonadh, e.g., páirtithe cás, eagraíochtaí taighde, árachas, iniúchtaí inmheánacha agus seachtracha, taighde tionscail a dhéanamh, tríú páirtithe a d’fhéadfadh feabhas a chur ar ár bpróisis agus ar ár seirbhísí (amhail sainchomhairleoirí).

Sonraí a Chomhroinnt leis an nGarda Síochána

Féadfaidh RTB sonraí pearsanta a chomhroinnt leis an nGarda Síochána (AGS) faoi alt 41 den Acht um Chosaint Sonraí, 2018.  Tá nósanna imeachta i bhfeidhm againn chun a chinntiú nach gcomhroinntear ach na sonraí iomchuí agus go bhfuil siad teoranta don chríoch faoina bhfuil an iarraidh sin déanta ag comhalta den Gharda Síochána ag a bhfuil an t-údarás cuí.

Sonraí a Chomhroinnt le Ranna, Comhlachtaí nó Gníomhaireachtaí Rialtais

Tá oibleagáid dhlíthiúil ar RTB sonraí pearsanta a chomhroinnt le gníomhaithe stáit mar atá leagtha amach in ailt 146, 147, 147A agus 148 den Acht um Thionóntachtaí Cónaithe, 2004 (arna leasú). I measc fhaighteoirí na sonraí sin tá an Roinn Coimirce Sóisialaí, na Coimisinéirí Ioncaim, Údarás Fuinnimh Inmharthana na hÉireann, údaráis áitiúla, agus TDanna (arna iarraidh sin agus ar bhonn cás ar chás) i gcás gur féidir uiríll a dhéanamh.  Féadfar a iarraidh ar RTB sonraí pearsanta sonracha a sholáthar i ndáil le himscrúdú ag údarás poiblí eile, a bhfuil an chumhacht sin tugtha dó ina reachtaíocht phríomhúil.  Tá RTB ina chomhlacht poiblí sonraithe de réir alt 261(3) den Acht Leasa Shóisialaigh (Comhdhlúthú), 2005 (arna leasú).

Comhroinnimid sonraí anaithnidithe ar chomhaontú leis an bPríomh-Oifig Staidrimh i gcomhréir leis na cumhachtaí atá ag an bPríomh-Oifig Staidrimh.

Sonraí a Chomhroinnt le húdaráis áitiúla

Comhroinnimid na sonraí seo a leanas le gach údarás áitiúil ar bhonn ráithiúil, faoin Acht um Thionóntachtaí Cónaithe.  Tá comhaontuithe comhroinnte sonraí againn leis na húdaráis áitiúla uile, agus tagann na húdaráis áitiúla chun bheith ar rialaitheoirí sonraí na sonraí a fhaigheann siad uainne, RTB, lena n-úsáid chun caighdeáin na tithíochta ar cíos a rialáil.  Comhroinntear sonraí clárúcháin maidir le tionóntachtaí príobháideacha, le tionóntachtaí Comhlachta Tithíochta Cheadaithe, le tionóntachtaí i leith cóiríocht atá sonrach do mhic léinn, agus le tionóntachtaí ar cíos de réir costais, lena n-áirítear sonraí pearsanta:

• Uimhir RT
• Seoladh na teaghaise ar cíos
• Éirchód
• Ainm an Tionónta/na dTionóntaí
• Cineál teaghaise
• Ainm an Tiarna Talún/na dTiarnaí Talún
• Seoladh poist don Tiarna Talún
• Seoladh ríomhphoist teagmhála don Tiarna Talún
• Uimhir theileafóin teagmhála don Tiarna Talún
• Uimhir theileafóin teagmhála don Tionónta
• Seoladh ríomhphoist an Tionónta

Sonraí a Chomhroinnt leis na Coimisinéirí Ioncaim

Comhroinnimid na sonraí seo a leanas leis na Coimisinéirí Ioncaim ar bhonn bliantúil, mar atá leagtha amach san Acht um Thionóntachtaí Cónaithe (alt 174A(1)(a)).  Ní chomhroinnimid leis na Coimisinéirí Ioncaim sonraí pearsanta na ndaoine aonair atá ag gníomhú thar ceann tiarna talún tríd an malartú sonraí bliantúil sin.

• Uimhir RT (Uimhir Thagartha RTB)
• Seoladh na Teaghaise ar Cíos
• Éirchód
• Tuairisc ar an teaghais ar cíos
• Ainm an Tiarna Talún/na dTiarnaí Talún
• Seoladh an Tiarna Talún/na dTiarnaí Talún
• Éirchód an Tiarna Talún/na dTiarnaí Talún
• Seoladh Ríomhphoist an Tiarna Talún/na dTiarnaí Talún
• Uimhir theileafóin/uimhir fón póca an Tiarna Talún/na dTiarnaí Talún (más ann)
• An UPSP/an Uimhir Chlárúcháin leis an Oifig um Chlárú Cuideachtaí de chuid an Tiarna Talún/na dTiarnaí Talún
• Dáta Tosaithe na Tionóntachta
• Méid Cíosa agus Minicíocht Íocaíochta
• Ainm an Tionónta/na dTionóntaí
• UPSP an Tionónta/na dTionóntaí (más ann)

• Cé acu atá an Tionóntacht gníomhach nó éighníomhach

Mar gheall ar na hathruithe ar an reachtaíocht ón 1 Márta 2026 ar aghaidh, is mar a leanas atá na catagóirí sonraí a fhéadfar a chomhroinnt (alt 147A(1)(b)), agus is chun tacú le rialacháin um chomhlíonadh agus um fhorfheidhmiú ar fud an dá eagraíocht ar mhaithe le leas an phobail atá sé sin.

• I gcás gur dealraitheach do RTB go bhfuil teaghais faoi réir tionóntacht neamhchláraithe nó gur féidir go bhfuil sí faoina réir, féadfaidh na Coimisinéirí Ioncaim an fhaisnéis seo a leanas a iarraidh
  • I gcás duine aonair – ainm, mionsonraí teagmhála, seoladh, UPSP
  • I gcás cuideachta – mionsonraí teagmhála, seoladh, uimhir thagartha cánach, etc.
  • I gcomhlacht corpraithe nach cuideachta é – ainm, mionsonraí teagmhála, seoladh agus uimhir thagartha cánach.
• Féadfaidh RTB seoladh na teaghaise, fad na tionóntachta, méid an chíosa is iníoctha, an líon tionóntaí agus aon fhaisnéis eile a theastóidh le réasún ó na Coimisinéirí Ioncaim chun críche a bhfeidhmeanna a chomhlíonadh a chomhroinnt leis na Coimisinéirí Ioncaim freisin.
• Féadfaidh RTB, dá dheoin féin, an fhaisnéis seo a leanas a nochtadh do na Coimisinéirí Ioncaim:
  • Faisnéis a bhaineann le breith smachtbhanna a fhorchur (alt 148X, fo-ailt 4(a) nó 5)
  • Faisnéis a bhaineann le smachtbhanna a forchuireadh faoi Chuid 7A
  • Faisnéis a bhaineann le tionóntacht nach bhfuil cláraithe faoi Chuid

Sonraí a Chomhroinnt leis an Roinn Coimirce Sóisialaí (RCS)

Faoi alt 146, soláthraíonn an Roinn Coimirce Sóisialaí faisnéis do RTB chun tacú le feidhmeanna RTB, go príomha trí shonraí Íocaíochta Cúnaimh Tithíochta a fháil chun críche comhlíonta agus forfheidhmiúcháin.  Féadfaidh RTB freisin, arna iarraidh sin, sonraí riachtanacha agus comhréireacha a sholáthar don Roinn Coimirce Sóisialaí le haghaidh feidhmeanna faoi Chaibidil 9 de Chuid 3 den Acht Leasa Shóisialaigh (Comhdhlúthú), 2005, agus chun críche ranníocaíochtaí airgeadais a íoc faoin Acht um an Dlí Sibhialta (Forálacha Ilghnéitheacha), 2022.

Comhroinnimid sonraí leis an Roinn Coimirce Sóisialaí chun críocha oibriú na hÍocaíochta Aitheantais Cóiríochta aici, trí chomhéadan feidhmchláir slán.  A bhuí leis sin, tá an Roinn Coimirce Sóisialaí in ann stádas an chláraithe a sheiceáil. Níl aon sonraí pearsanta eile de chuid an chláraithe le feiceáil.

Sonraí a Comhroinnt le hÚdarás Fuinnimh Inmharthana na hÉireann (SEAI)

Faoi alt 146(5), féadfaidh RTB sonraí a fháil ó SEAI maidir le faisnéis a bhaineann le teaghais, i.e., an t-achar urláir, an Rátáil Fuinnimh Foirgnimh.  Féadfaidh RTB sonraí atá riachtanach agus comhréireach chun dualgais SEAI a chomhlíonadh a chomhroinnt i ndáil le teaghaisí sonracha.

Comhroinnt idir ár nAonaid Ghnó

Chun ár ndualgais a chomhlíonadh, féadfaimid faisnéis a chomhroinnt i measc ár rannóg inmheánach, i.e., laistigh de RTB. Is é seo a leanas liosta neamh-uileghabhálach de na himthosca inar féidir go mbeidh sé riachtanach faisnéis a chomhroinnt ar fud rannóga inmheánacha RTB:

• Féadfaidh an Rannóg um Sheirbhísí do Chustaiméirí faisnéis a chomhroinnt le haon rannóg iomchuí de chuid RTB ar cheisteanna, gearáin nó iarrataí a fháil.
• Féadfaidh an Rannóg Airgeadais mionsonraí airgeadais a mhalartú agus íocaíochtaí á ndéanamh nó á bhfáil aici.
• Féadfaidh an Rannóg Imscrúduithe agus Smachtbhannaí, an Rannóg um Fhorfheidhmiú Clárúcháin, an Rannóg um Fhorfheidhmiú Cinntí, agus an Rannóg Díospóidí agus Binsí faisnéis a mhalartú le haghaidh seirbhísí um réiteach díospóidí agus le haghaidh imeachtaí dlí.
• Féadfaidh an Rannóg Cláruithe, an Rannóg Díospóidí agus Binsí, an Rannóg Cumarsáide agus an Rannóg Taighde faisnéis a mhalartú leis an Rannóg Imscrúduithe agus Smachtbhannaí agus leis an Rannóg um Fhorfheidhmiú Clárúcháin chun sáruithe amhrasta ar oibleagáidí tiarnaí talún a imscrúdú.
• Féadfaidh an Rannóg Cláruithe sonraí a chomhroinnt ar bhonn cás ar chás chun cláruithe tionóntachta a fhíorú agus le haghaidh seirbhísí um réiteach díospóidí, le haghaidh imscrúduithe faoi Chuid 7A den Acht um Thionóntachtaí Cónaithe agus le haghaidh imeachtaí dlí.
• Comhroinnfear sonraí anaithnidithe leis an Aonad Taighde agus Beartais chun an tInnéacs Cíosa, taighde earnála, tuarascálacha earnála agus foilseacháin earnála a fhorbairt.
• Féadfaidh rannóga éagsúla faisnéis a chomhroinnt chun cruinneas na faisnéise atá á sealbhú a fhíorú.
• Féadfaidh rannóga éagsúla faisnéis a chomhroinnt chun na seoltaí a fhíorú chun críocha comhfhreagrais.

Aistrithe Idirnáisiúnta Sonraí Pearsanta

Is gnáthbheartas é gur laistigh d’Éirinn agus den Aontas Eorpach/den Limistéar Eorpach Eacnamaíoch a choimeádtar na sonraí pearsanta uile a bpróiseálann RTB iad.

Féadfaimid do shonraí pearsanta a aistriú amach as an Aontas Eorpach/an Limistéar Eorpach Eacnamaíoch chun críocha próiseála.  Ní dhéanfaidh RTB é sin ach amháin le tíortha a bhfuil dlíthe leordhóthanacha acu chun a chinntiú go gcosnaítear sonraí pearsanta trí na comhaontuithe leordhóthanachta leis an Aontas Eorpach agus atá ag comhlíonadh RGCS go hiomlán maidir leis na Clásail Chonarthacha Chaighdeánacha riachtanacha atá leagtha amach ag an Aontas Eorpach.

Coinníonn RTB aon aistriú idirnáisiúnta sonraí chomh híseal agus is féidir, agus ní fhéadfaidh sé sin tarlú ach amháin in imthosca teoranta.

Sonraí Pearsanta a Fhoilsiú

Mar rialálaí an mhargaidh tithíochta ar cíos, tá freagracht ar RTB as seirbhísí um réiteach díospóidí mar atá leagtha amach san Acht um Thionóntachtaí Cónaithe, 2004 (arna leasú).

Tá oibleagáid dhlíthiúil orainn gach Ordú Cinnidh a fhoilsiú.    Áirítear leis na horduithe sin ainmneacha agus seoltaí.  Ní fhéadfar na hOrduithe a scriosadh ná a cheartú toisc go bhfuil éifeacht dhlíthiúil ag an Ordú.

Má bhíonn achomharc ann, foilseofar tuarascáil na héisteachta Binse i dteannta na nOrduithe Cinnidh ar ár suíomh Gréasáin.  Ní féidir na tuarascálacha sin a leasú ag an bpointe sin de ghnáth, agus ba cheart na páirtithe i mBinse a bheith ar an eolas go bhféadfadh iriseoirí na tuarascálacha sin a úsáid chun alt a scríobh faoin gcás.

I gcás go gcuirtear smachtbhanna i bhfeidhm maidir le tiarna talún i leith iompar míchuí mar atá leagtha amach in alt 7A den Acht um Thionóntachtaí Cónaithe, 2004 (arna leasú), foilseoimid an toradh a luaithe a bheidh an próiseas deimhnithe cúirte tugtha chun críche.

An Clár Tionóntachtaí

De réir alt 127(3)(A) den Acht um Thionóntachtaí Cónaithe, 2004 (arna leasú sa bhliain 2026), is féidir cuardach a dhéanamh le haghaidh an tsleachta den chlár tionóntachtaí trí Éirchód nó seoladh ceart a iontráil.  De réir na sonraí a bheidh iontráilte, gheobhaidh tú ceann amháin de na freagraí seo: ‘tá, tá sí cláraithe’ nó ‘níl, níl sí cláraithe’.  Ní chuirfear aon mhionsonraí eile faoin maoin ar fáil, mar atá leagtha amach in alt 128(4) den Acht um Thionóntachtaí Cónaithe, 2004 (arna leasú).

Tá clár cíosa inchomparáide ar fáil ar ár suíomh Gréasáin, agus is féidir le daoine é a úsáid chun cuardach a dhéanamh le haghaidh cíosanna inchomparáide.  Tá tuilleadh faisnéise ar fáil ar www.rtb.ie. Nuair a dhéanann tú cuardach, gheobhaidh tú tuairisceán sonraí ina mbeidh deich dtionóntacht ar a mhéad. Is iad seo a leanas na sonraí a chomhroinnfear: Uimhir RT, cíos míosúil, Rátáil Fuinnimh Foirgnimh, méid urláir, an líon seomraí leapa.

Ní chomhroinnfear seoladh ná Éirchód aon chláruithe a thugtar mar thoradh ar chuardach ar an gclár sin.

Maidir le cláruithe i leith cóiríocht atá sonrach do mhic léinn, foilsíonn RTB doiciméad ar an suíomh Gréasáin faoi láthair ina bhfuil an chóiríocht chláraithe ar fad do mhic léinn le linn na bliana acadúla.   Is féidir leat rochtain a fháil ar an doiciméad sin ag Student-Specific-Accommodation-Rent-Register-March-1-2026_V_1.pdf, áit a bhfuil na réimsí sonraí céanna agus atá ann i gcás tionóntachtaí príobháideacha agus tionóntachtaí atá ar chíos sóisialta.

Cé na cearta atá agat mar ábhar sonraí?

Mar ábhar sonraí, beidh na cearta seo a leanas agat, mar atá leagtha amach sa rannán seo. Mar sin féin, is féidir go mbeidh feidhm ag srianta in imthosca áirithe, e.g., aighneachtaí fianaise doiciméadaí. Tabhair faoi deara nach bhfuil feidhm ag cearta áirithe ábhar sonraí faoin Treoir maidir le Cosaint Sonraí i réimse Fhorfheidhmiú an Dlí (lena n-áirítear an ceart chun agóid a dhéanamh agus an ceart chun iniomparthacht sonraí).

Tá díolúintí agus srianta breise ann freisin ar féidir iad a chur i bhfeidhm maidir le cearta ábhar sonraí. Áirítear leo sin a chinntiú nach gcuirfear bac ar fhiosrúcháin oifigiúla nó dhlíthiúla, ar imscrúduithe oifigiúla nó dlíthiúla nó ar nósanna imeachta oifigiúla nó dlíthiúla, nó a chinntiú nach ndéanfar dochar do chionta coiriúla a chosc, a bhrath, a imscrúdú nó a ionchúiseamh. Déileáiltear le hiarrataí ar bhonn cás ar chás.

Ceart Rochtana (Airteagal 15 RGCS agus alt 91 den Acht um Chosaint Sonraí le haghaidh na Treorach maidir le Cosaint Sonraí i réimse Fhorfheidhmiú an Dlí)

Tá an ceart agat chun:

• deimhniú a fháil uainn go bhfuil do shonraí pearsanta á bpróiseáil;
• rochtain ar do shonraí pearsanta; agus
• mionsonraí áirithe eile a bhaineann leis an dóigh a n-úsáidimid do shonraí pearsanta (rud atá curtha ar áireamh sa Ráiteas Príobháideachta seo go ginearálta ar aon nós).

Féadfaidh tú cóipeanna de thaifid pháipéir agus leictreonacha fút (lena n-áirítear glaonna taifeadta, i gcás gurb infheidhme) a shealbhaímid, a chomhroinnimid nó a úsáidimid a iarraidh. Chun déileáil le d’iarraidh, iarrfaimid cruthúnas ar do chéannacht agus dóthain sonraí pearsanta fút chun go mbeimid in ann na sonraí pearsanta atá iarrtha agat a aimsiú. Agus an fhaisnéis sin á hiarraidh agat, comhlánaigh Foirm Iarrata ar Rochtain d’Ábhair Sonraí, rud is féidir a fháil anseo, nó is féidir leat ríomhphost a sheoladh chuig dataprotection@rtb.ie

Agus d’iarraidh á cur isteach agat, tabhair dúinn faisnéis chun cabhrú linn do chéannacht a fhíorú, amhail fótachóip de do phas agus bille fóntais agus an oiread mionsonraí agus is féidir chun cabhrú linn an fhaisnéis ar mian leat rochtain a fháil uirthi a shainaithint (i.e., raon dátaí, ábhar na hiarrata). Tabhair faoi deara gur in aisce atá iarraidh rochtana. I gcás go gcinnimid nach bhfuil údar maith le hiarraidh nó go bhfuil sí iomarcach, áfach, féadfaimid táille réasúnach a ghearradh ort.

Ar d’iarraidh a fháil, déanfaimid iarracht freagra a thabhairt laistigh den tréimhse reachtúil 30 lá dá bhforáiltear in RGCS. Má theastaíonn níos mó ama uainn chun déileáil le d’iarraidh, nó má theastaíonn uainn go soiléireoidh tú tuilleadh faisnéise, beimid i dteagmháil leat chun é sin a phlé.

An Ceart go nDéanfaí Ceartúcháin (Airteagal 16 RGCS agus alt 92 den Acht um Chosaint Sonraí le haghaidh na Treorach maidir le Cosaint Sonraí i réimse Fhorfheidhmiú an Dlí)

Tá sé de cheart agat a iarraidh go bhfuil na sonraí pearsanta atá á sealbhú maidir leat cothrom le dáta agus cruinn. I gcás go bhfuil faisnéis míchruinn nó neamhiomlán, féadfaidh tú teagmháil a dhéanamh linn chun a iarraidh go ndéanfaí an fhaisnéis a cheartú. Ar iarraidh a fháil, déanfaimid ár ndícheall a chinntiú go ndéanfar na sonraí pearsanta a cheartú agus go mbeidh siad chomh cothrom le dáta agus is féidir go réasúnach.

Tabhair faoi deara gur féidir nach ngéillfear d’iarrataí i roinnt imthosca. Sna cásanna sin, míneoimid ár mbreith, agus is féidir go mbeidh sé sin mar gheall ar chomhthéacs dlíthiúil úsáid na sonraí.

An Ceart go nDéanfaí Ligean i nDearmad (Airteagal 17 RGCS agus alt 92 den Acht um Chosaint Sonraí le haghaidh na Treorach maidir le Cosaint Sonraí i réimse Fhorfheidhmiú an Dlí)

Tá sé de cheart agat a iarraidh go ndéanfaí léirscriosadh ar shonraí pearsanta a bhaineann leat sna himthosca seo a leanas:

• Níl na sonraí pearsanta riachtanach a thuilleadh i ndáil leis na críocha ar chucu a fuarthas iad.
• I gcás go bhfuil sonraí á bpróiseáil bunaithe ar thoiliú agus go dtarraingíonn tú siar an toiliú sin leis an bpróiseáil agus nach bhfuil aon bhunús dleathach eile ann.
• Tá na sonraí pearsanta á bpróiseáil go neamhdhleathach.
• Déanann tú agóid i gcoinne phróiseáil na sonraí pearsanta agus ní ann d’fhorais dhlisteanacha sháraitheacha leis an bpróiseáil.
• Caithfear do shonraí pearsanta a scriosadh i gcomhréir le ceanglais dhlíthiúla.

Mar sin féin, ní bheimid in ann iarraidh léirscriosta a chomhlíonadh más gá sonraí pearsanta a phróiseáil chun na gcríoch seo a leanas:

• An ceart ar an tsaoirse chun tuairimí a nochtadh agus faisnéis a fháil a fheidhmiú.
• Oibleagáid dhlíthiúil a chomhlíonadh nó cúram a chur i gcrích a dhéantar ar mhaithe le leas an phobail.
• Cartlannú a dhéanamh nó críocha staidrimh ar mhaithe le leas an phobail.
• Éilimh dhlíthiúla a bhunú, a fheidhmiú nó a chosaint.

Tabhair faoi deara gurb é an príomhbhunús dlí atá leis an bpróiseáil a dhéanaimid ar shonraí pearsanta ná oibleagáid dhlíthiúil, mar atá leagtha amach faoin Acht um Thionóntachtaí Cónaithe, 2004 (arna leasú).  Déantar gníomhaíochtaí próiseála breise go príomha le haghaidh seirbhísí um réiteach díospóidí, le haghaidh imscrúduithe faoi Chuid 7A den Acht um Thionóntachtaí Cónaithe, le haghaidh forfheidhmiú i leith neamhchlárúcháin nó le haghaidh imeachtaí dlí. Chuige sin, is féidir nach mbeidh roinnt próiseála a bhaineann le do shonraí faoi réir an chirt go ndéanfaí léirscriosadh.

Chun bailíocht d’iarrata léirscriosta a dhéanamh amach i gcomhréir le gníomhaíocht ghaolmhar próiseála RTB, déanfaimid measúnú ar an údar atá le do shonraí pearsanta a choinneáil i gcás go bhfuil feidhm ag ceanglas dlíthiúil agus déanfaimid teagmháil leat mura bhfuilimid in ann d’iarraidh a chomhlíonadh.

Tabhair faoi deara gur féidir go mbeidh orainn roinnt faisnéise a choinneáil in imthosca áirithe chun a chinntiú go gcloífear le do chuid sainroghanna agus ár ndualgais á gcomhlíonadh againn.

An Ceart go gCuirfí Srian (Airteagal 18 RGCS)

Tá sé de cheart agat srian a chur le méid na sonraí pearsanta a phróiseálaimid sna himthosca seo a leanas:

• Creideann tú nach bhfuil na sonraí pearsanta cruinn, agus sa chás sin caithfimid srian a chur le haon phróiseáil agus cruinneas do shonraí pearsanta á fhíorú againn.
• Creideann tú go bhfuil próiseáil na sonraí pearsanta neamhdhleathach, ach is mian leat srian a chur leis an bpróiseáil sonraí seachas na sonraí a léirscriosadh.
• I gcás nach dteastaíonn na sonraí pearsanta ó RTB a thuilleadh ach go dteastaíonn na sonraí uait le haghaidh éileamh dlíthiúil a bhunú, a fheidhmiú nó a chosaint.
• Tá agóid ar feitheamh agat i gcoinne phróiseáil do shonraí pearsanta.

Nuair a chuirtear srian le próiseáil, ní dhéanfar do shonraí pearsanta a phróiseáil ach amháin:

• le do thoiliú;
• chun éilimh dhlíthiúla a bhunú, a fheidhmiú nó a chosaint;
• chun cearta daoine eile a chosaint; nó
• ar chúiseanna atá tábhachtach ar mhaithe le leas an phobail.

Déanfaimid teagmháil leat chun a dheimhniú an bhfuil an iarraidh ar shrianadh comhlíonta, agus ní chuirfimid deireadh leis an srian ach amháin tar éis dúinn a chur in iúl duit go bhfuilimid ag déanamh amhlaidh. Tabhair faoi deara gur féidir nach ngéillfear d’iarrataí i roinnt imthosca, i.e., ní fhéadfar srian a chur le próiseáil sonraí pearsanta le haghaidh imeachtaí forfheidhmiúcháin toisc gur gá í chun an tAcht um Thionóntachtaí Cónaithe, 2004 (arna leasú), a chomhlíonadh.

An Ceart chun Iniomparthacht Sonraí (Airteagal 20 RGCS)

Níl feidhm ag an gceart chun iniomparthacht sonraí ach amháin:

• maidir le sonraí pearsanta atá tugtha agat dúinn (i.e., gan aon fhaisnéis eile);
• i gcás go bhfuilimid ag próiseáil do shonraí pearsanta toisc gur thug tú do thoiliú dúinn déanamh amhlaidh, nó faoi chonradh leat; agus
• i gcás go ndéantar an phróiseáil trí mhodhanna uathoibrithe.

Is dóigh nach mbeidh feidhm ag an gceart chun iniomparthacht sonraí ach amháin in imthosca an-teoranta.

An Ceart chun Agóid a Dhéanamh (Airteagal 21 RGCS)

Tá an ceart agat chun agóid a dhéanamh aon tráth i gcoinne phróiseáil do shonraí pearsanta a bhaineann leat, ar próiseáil í a dhéantar ar bhonn leas an phobail nó ar bhonn leasa dhlisteanaigh againn. Tabhair faoi deara gurb é an príomhbhunús dlí atá leis an bpróiseáil a dhéanaimid ar shonraí pearsanta ná oibleagáid dhlíthiúil, mar atá leagtha amach faoin Acht um Thionóntachtaí Cónaithe, 2004 (arna leasú).

Is dóigh nach mbeidh feidhm ag an gceart chun agóid a dhéanamh ach amháin in imthosca an-teoranta. Más mian leat agóid a dhéanamh i gcoinne próiseáil sonraí, déan teagmháil linn le d’iarraidh. Ansin, cuirfimid stop le sonraí pearsanta a phróiseáil mura bhfuil gá léi le haghaidh imeachtaí dlí.

Tabhair faoi deara gurb amhlaidh, má iarrann tú ar RTB stop a chur le do shonraí pearsanta a phróiseáil, is féidir nach mbeimid in ann ár seirbhísí a sholáthar duit.

An ceart gan a bheith faoi réir Cinnteoireacht Uathoibrithe, lena n-áirítear Próifíliú (Airteagal 22)

Ní dhéanann RTB aon chinnteoireacht ná próifíliú lán-uathoibrithe ina n-úsáidtear sonraí pearsanta.

Tá tú i dteideal teagmháil a dhéanamh leis an gCoimisiún um Chosaint Sonraí má tá aon ghearáin agat maidir le forfheidhmiú do cheart.

Ár gCumarsáidí

Is féidir go ndéanfaimid teagmháil leat ó am go ham le haghaidh faisnéis maidir le gnéithe áirithe de do chuid déileálacha le RTB. Beidh baint ag an teagmháil sin leis na críocha dá dtagraítear sa Ráiteas Príobháideachta seo agus is féidir go n-áireofar léi na nithe seo a leanas:

• Chun teagmháil a dhéanamh leat maidir le do chlárú tionóntachta.
• Mar chuid de sheirbhísí um réiteach díospóidí, d’imeachtaí imscrúdaithe agus smachtbhannaí, agus d’imeachtaí dlí.
• Chun faisnéis a bhailiú chun taighde earnála, tuarascálacha earnála agus foilseacháin earnála a sholáthar.
• Chun freagra a thabhairt ar iarrataí, ar cheisteanna nó ar ghearáin.

Déanfaidh RTB dianiarracht gan teagmháil a dhéanamh leat lasmuigh de ghnáthuaireanta oibre gnó.

May 2026