Conas tionóntacht cóiríochta sonrach do mhic léinn (SSA) a chlárú

Rialacha clárúcháin do thionóntachtaí i leith cóiríocht atá sonrach do mhic léinn

Tá rialacha clárúcháin difriúla ag tionóntachtaí i leith cóiríocht atá sonrach do mhic léinn i gcomparáid le tionóntachtaí príobháideacha eile. Áirítear iad seo a leanas leis na príomhdhifríochtaí:

• Meastar gur tionóntacht nó ceadúnas ar leithligh iad gach seomra aonair, fiú má tá níos mó ná mac léinn amháin sa seomra (seomraí dhá leaba, mar shampla).
• Ní mór gach seomra in aonad a chlárú.
• Níl córas cuntais ar líne RTB ar fáil do sholáthraithe cóiríochta atá sonrach do mhic léinn faoi láthair.
• Ní mór duit Bileog Sonraí Tionóntachta a chomhlánú agus a chur isteach le haghaidh gach tionóntachta i leith cóiríocht atá sonrach do mhic léinn.

Clár um chóiríocht atá sonrach do mhic léinn

Is é atá sa chlár um chóiríocht atá sonrach do mhic léinn ná liosta de gach ceann de na tionóntachtaí i leith cóiríocht atá sonrach do mhic léinn atá cláraithe le RTB ag pointe ama ar leith.

An bhileog sonraí tionóntachta a chomhlánú

A luaithe a bheidh an bhileog sonraí tionóntachta íoslódáilte agat, oscail an comhad agus comhlánaigh gach cuid. Má tá níos mó ná ceann amháin d’fhorbairtí cóiríochta atá sonrach do mhic léinn agat, comhlánaigh bileog sonraí tionóntachta amháin do gach forbairt ar leith agus seol ar ais iad ar leithligh. Ní féidir leat níos mó ná forbairt amháin a chur leis an aon bhileog sonraí cóiríochta amháin.

Táille ilchodach (colún gorm)

Sa cholún ‘Composite’, roghnaigh ‘yes’ do gach maoin atá incháilithe le haghaidh táille ilchodach, dar leat. Faigh tuilleadh faisnéise faoi cad is táille ilchodach ann.

Rannáin den bhileog sonraí tionóntachta

Rannán 1: Ainm agus faisnéis sonraisc na forbartha

• Comhlánaigh ainm, seoladh agus seoladh sonraisc na forbartha.
• Deimhnigh cé atá ag comhlánú na bileoige sonraí tionóntachta (tiarna talún, gníomhaire, nó cuideachta bainistíochta).
• Cuir tic leis na boscaí chun a dheimhniú go bhfuil an fhaisnéis atá tugtha ceart.

Faisnéis bhreise do ghníomhairí nó do chuideachtaí bainistíochta

• Tabhair mionsonraí teagmhála (ainm, seoladh ríomhphoist, uimhir fóin) an duine atá ag comhlánú na bileoige sonraí tionóntachta.
• Deimhnigh go bhfuil an t-údarás agat chun gníomhú thar ceann an tiarna talún.

Rannán 2: Mionsonraí an tiarna talún

• Roghnaigh cé acu is cuideachta nó duine aonair é an tiarna talún.
• Más duine aonair é an tiarna talún, tabhair an Uimhir Phearsanta Seirbhíse Poiblí (UPSP). Más ann do roinnt tiarnaí talún, tabhair UPSP gach tiarna talún.
• Más cuideachta é an tiarna talún, tabhair an uimhir chláraithe le CRO.
• Tabhair mionsonraí teagmhála an tiarna talún (seoladh, Éirchód, uimhir fóin, agus seoladh ríomhphoist).

Rannán 3: Mionsonraí an ghníomhaire

Má tá gníomhaire i gceist, tabhair mionsonraí an ghníomhaire (ainm, cuideachta, UPSP nó uimhir le CRO, faisnéis teagmhála).

Rannán 4: Mionsonraí na cuideachta bainistíochta

Tabhair mionsonraí na cuideachta bainistíochta atá bainteach leis an maoin, más ann di.

Rannán 5: Seoladh na maoine ar cíos

• I gcás gach seomra, iontráil an seoladh i ró amháin i gcomhad Excel.
• Tabhair ainm an fhoirgnimh, an bloc (más infheidhme), uimhir an aonaid agus uimhir nó litir an tseomra (sann ceann mura bhfuil ceann acu cheana féin).
• Contae, Éirchód agus mionsonraí an údaráis áitiúil.

Rannán 6: Mionsonraí na tionóntachta

• Liostaigh an líon áititheoirí atá sa seomra (mar shampla, beirt i seomra dhá leaba).
• Tabhair dáta tosaithe na tionóntachta (LL/MM/BBBB).
• Mionsonraigh minicíocht íocaíochta an chíosa (gach mí, gach seimeastar, nó gach téarma).
• Sonraigh an cíos iomlán don seomra (seachas an cíos in aghaidh an tionónta).
• Sonraigh méid na héarlaise agus aon réamhchíosa íoctha.

Rannán 7: Mionsonraí na dtionóntaí

I gcás gach tionónta, tabhair a n-ainm, an UPSP atá acu (roghnach) agus a seoladh ríomhphoist. Mura bhfuil an UPSP agat, marcáil “X” chun a dheimhniú gur iarr tú í.

Fadhbanna maidir leis an mbileog sonraí tionóntachta a rochtain

Tá roinnt rannán den bhileog sonraí íocaíochta glasáilte. Más rud é gur gá duit na mionsonraí sin a chur in eagar nó go bhfuil aon fhadhbanna agat an Bhileog Sonraí Tionóntachta a rochtain, seol ríomhphost chuig ssa@rtb.ie.

Tá Bileog Sonraí Tionóntachta comhlánaithe agat cheana féin

Má tá Bileog Sonraí Tionóntachta comhlánaithe agat cheana féin, seol ríomhphost chuig ssa@rtb.ie chun Bileog Sonraí Tionóntachta phearsantaithe a fháil.

Conas an bhileog sonraí tionóntachta a sheoladh ar ais

Sula seolann tú do bhileog sonraí tionóntachta chomhlánaithe chugainn, sábháil í le pasfhocal.

• Cliceáil ar ‘Save as’
• Nuair atá an bosca ‘Save as’ oscailte, cliceáil ar an roghchlár anuas ‘Tools’.
• Roghnaigh ‘General Options’ agus cliceáil ar an rogha ‘Password to open’.
• Iontráil mionsonraí do phasfhocail agus sábháil iad.

Nuair atá tú réidh:

1. Seol an bhileog sonraí tionóntachta chomhlánaithe le ríomhphost chuig ssa@rtb.ie.
2. Seol an pasfhocal i ríomhphost ar leith chuig ssa@rtb.ie.

Nuair a fhaighimid an bhileog sonraí tionóntachta

Deimhneoidh ár bhfoireann um chóiríocht atá sonrach do mhic léinn go bhfuaireamar do bhileog sonraí tionóntachta. Déanfaimid athbhreithniú ar an bhfaisnéis, cinnteoimid go bhfuil sí cruinn agus ríomhfaimid an táille chlárúcháin.

Eiseoimid sonrasc chugat agus beidh 30 lá agat chun an táille chlárúcháin a íoc. Gearrfar táillí déanacha mura n-íocann tú laistigh den tréimhse 30 lá.