Cathain ba cheart a chlárú - Bord um Tionóntachtaí Cónaithe

Cothabháil Riachtanach Pleanáilte – Tairseach Chuntais Ar Líne RTB ar fáil ar an 16 Eanáir 2025 – Léigh tuilleadh faoin bhfógra seo

Cuirfear aistriúchán ar fáil go luath

Ár leithscéal as an míchaoithiúlacht. Cuirfear aistriúchán Gaeilge ar an leathanach seo ar fáil go luath. Go raibh maith agat as do chuid foighneachta agus muid ag obair ar leagan uasdátaithe.

Cathain ba cheart a chlárú

Cathain nach mór tionóntacht a chlárú?

Ní mór duit gach tionóntacht a chlárú:

  • Nuair a thosaíonn tionóntacht nua: cláraigh an tionóntacht laistigh de mhí amháin ó dháta tosaithe na tionóntachta.
  • Gach bliain: cláraigh an tionóntacht ar chomóradh lae dháta tosaithe na tionóntachta.

Ní mór duit an clárú tionóntachta a nuashonrú freisin nuair atá athrú tagtha ar an gcíos nó ar mhionsonraí eile tionóntachta. Mar shampla, i gcás go mbeidh athrú tagtha ar roinnt tionóntaí ach go mbeidh duine amháin ar a laghad de na tionóntaí bunaidh ag fanacht.

Is féidir leat treoracha mionsonraithe a fháil faoi conas tionóntacht nua a chlárú, faoi conas tionóntacht i leith cóiríocht atá sonrach do mhic léinn a chlárú, faoi conas do chlárú bliantúil a chomhlánú, nó faoi conas clárú a nuashonrú.

Athraíodh na dlíthe maidir le clárú bliantúil an 4 Aibreán 2022.

Is féidir leat tuilleadh faisnéise a léamh faoin gcóras clárúcháin a bhí i bhfeidhm roimh an dáta sin in ‘An dlí maidir le clárú’ thíos.

Sampla 1: tionóntacht nua

Tosaíonn tionóntacht an 15 Bealtaine 2025. Ní mór don tiarna talún an tionóntacht a chlárú faoin 14 Meitheamh 2025 (laistigh de mhí amháin) chun táillí déanacha a sheachaint. Má leanann an tionóntacht ar aghaidh, ní mór don tiarna talún í a chlárú arís faoin 14 Meitheamh 2026, agus ansin faoin 14 Meitheamh gach bliain chomh fada agus a mhaireann an tionóntacht.

Sampla 2: tionóntacht atá ann cheana

Thosaigh tionóntacht an 9 Meán Fómhair 2018. Ní mór don tiarna talún a chinntiú go bhfuil an tionóntacht cláraithe faoin 9 Meán Fómhair 2022 (tráth nach déanaí ná an 8 Deireadh Fómhair 2022) chun táillí déanacha a sheachaint. Má leanann an tionóntacht ar aghaidh, ní mór don tiarna talún í a chlárú arís faoin 8 Deireadh Fómhair gach bliain chomh fada agus a mhaireann an tionóntacht.

Sampla 3: Tionóntacht Chuid 4 Bhreise

Thosaigh tionóntacht an 1 Eanáir 2016. An 1 Eanáir 2020, rinneadh tionóntacht Chuid 4 Bhreise di, a d’fhéadfadh maireachtáil ar feadh 6 bliana. Chláraigh an tiarna talún an tionóntacht an 15 Eanáir 2020.

Thosaigh clárú bliantúil an 4 Aibreán 2022. Bhí ar an tiarna talún an tionóntacht a chlárú arís laistigh de mhí amháin ón 1 Eanáir 2023 (laistigh de mhí amháin ó chomóradh lae dháta tosaithe na tionóntachta, eadhon, faoin 31 Eanáir 2023).

Má leanann an tionóntacht ar aghaidh, ní mór don tiarna talún í a chlárú arís faoin 31 Eanáir gach bliain chomh fada agus a mhaireann an tionóntacht.

Tá tarscaoileadh sealadach táillí ann do thionóntachtaí Chuid 4 Bhreise, má chuirtear gach clárú bliantúil i gcrích in am.

Ní cuimhin liom cathain a bheidh mo thionóntacht dlite lena clárú bliantúil

Seiceáil do chuntas clárúcháin

Tá tú freagrach as a chinntiú go gclárófar do thionóntachtaí in am. Is féidir leat a sheiceáil cathain a bheidh do thionóntacht dlite lena clárú bliantúil ar do chuntas clárúcháin.

Lean na céimeanna seo:

  1. Logáil isteach i do chuntas clárúcháin.
  2. Téigh go dtí an rannán ‘Manage Registrations’ ar an leathanach baile.
  3. Úsáid an scagaire chun ‘Pending Registration’ a roghnú. Taispeánfar leis sin duit na tionóntachtaí atá dlite lena gclárú bliantúil.
  4. Seiceáil an colún ‘Next Registration Due Date’ le haghaidh gach tionóntachta.

Meabhrúcháin

Cuirfimid i gcuimhne duit freisin cathain a bheidh do thionóntacht dlite lena clárú bliantúil, má tá d’fhaisnéis teagmhála cothrom le dáta ar do chuntas clárúcháin.

Seolfaimid litreacha meabhrúcháin chugat tríd an bpost nó le ríomhphost, ag brath ar do rogha.

  • An chéad mheabhrúchán: 30 lá roimh dháta dlite an chlárúcháin.
  • An dara meabhrúchán: ar an dáta dlite, agus mí amháin tugtha chun clárú ar mhaithe le táillí déanacha a sheachaint.
  • An meabhrúchán deiridh: 5 lá roimh an spriocdháta do dhul in éag.
  • Fógra faoi tháille dhéanach: tar éis an spriocdháta do dhul in éag agus nuair atá feidhm ag táillí déanacha.

Clárú déanach

Féadfaidh tú do chlárú bliantúil a dhéanamh suas le mí féilire amháin tar éis an dáta dhlite. Mura n-éiríonn leat an spriocdháta clárúcháin a chomhlíonadh, beidh feidhm ag táillí déanacha i leith gach míosa a bhfuil an clárú déanach ar a bhfeadh.