Cothabháil Riachtanach Pleanáilte – Tairseach Chuntais Ar Líne RTB ar fáil ar an 16 Eanáir 2025 – Léigh tuilleadh faoin bhfógra seo
Cuirfear aistriúchán ar fáil go luath
Ár leithscéal as an míchaoithiúlacht. Cuirfear aistriúchán Gaeilge ar an leathanach seo ar fáil go luath. Go raibh maith agat as do chuid foighneachta agus muid ag obair ar leagan uasdátaithe.
Ní mór do thiarnaí talún tionóntachtaí cónaithe nua a chlárú leis an mBord um Thionóntachtaí Cónaithe (RTB) laistigh de 30 lá ó dháta tosaithe na tionóntachta.
Ní mór duit freisin clárú bliantúil le haghaidh gach tionóntachta a chomhlánú ar chomóradh lae dháta tosaithe na tionóntachta.
Ar an leathanach seo, leagtar amach na céimeanna chun tionóntacht nua a chlárú nó chun do chlárú bliantúil a athnuachan.
Léigh tuilleadh faoi cé hiad na daoine nach mór dóibh clárú.
Sula dtosaíonn tú, bíodh na mionsonraí seo a leanas lámh leat:
Cé nach bhfuil sé riachtanach, moltar go mór uimhreacha PSP nó dátaí breithe do thionóntaí a sholáthar toisc gur féidir leis sin cabhrú le haon díospóidí tionóntachta amach anseo.
Chun a chinntiú nach ndéanfar an t-aon mhaoin amháin a chlárú faoi dhó, ní mór duit an tÉirchód ceart a sholáthar le linn an phróisis clárúcháin. Mura bhfuil an tÉirchód ceart, déanfaimid athbhreithniú air. Ní féidir leat an seoladh a athrú a luaithe atá sé cláraithe. Mar sin de, déan cinnte de go bhfuil na mionsonraí cruinn.
Is é an bealach is fusa chun do thionóntacht a chlárú ná trí thairseach cuntais ar líne RTB. Tá sé simplí cuntas clárúcháin a bhunú. Is féidir leat amharc ar an bhfíseán seo ar conas tionóntacht a chlárú.
Logáil isteach i do chuntas clárúcháin agus iontráil an seoladh ríomhphoist agus an pasfhocal céanna a d’úsáid tú chun do chuntas clárúcháin a chruthú.
Seiceáil an bhfuil do mhionsonraí ar ‘My profile’ cothrom le dáta nó nach bhfuil. Úsáidfear na mionsonraí sin le linn an phróisis clárúcháin.
Roghnaigh ‘Cruthaigh clárú nua’ ar an leathanach baile. Tá 8 gcéim i gceist le tionóntacht a chlárú, agus tá achoimre orthu sin thíos.
Má theastaíonn tuilleadh faisnéise nó ama uait, is féidir leat do chlárú a shábháil mar dhréacht agus filleadh air tráth níos déanaí. Cliceáil ar ‘Save draft and return to dashboard’.
Is féidir do dhréacht a aimsiú ar do scáileán ‘Manage registrations’ agus fanfaidh sé ann ar feadh 60 lá.
Mura gcríochnaíonn tú do dhréacht-iarratas, scriosfar é ó do chuntas tar éis 60 lá.
Roghanna íocaíochta le haghaidh cláruithe ar líne
A luaithe a bheidh do chlárú críochnaithe agat, is féidir leat do tháille chlárúcháin a íoc tríothu seo a leanas:
Má roghnaíonn tú íoc trí PayPal nó trí SEPA, logálfar amach as do chuntas clárúcháin thú agus beidh ort logáil isteach arís tar éis duit an próiseas íocaíochta a chríochnú.
Íocaíocht a dheimhniú
A luaithe atá d’íocaíocht deimhnithe, seolfar d’admháil chugat le ríomhphost. Is féidir leat í a fháil sa rannán teachtaireachtaí de do chuntas clárúcháin freisin.
Is féidir leat filleadh ar do chláruithe trí ‘Return to manage registrations’ a roghnú.
Feicfidh tú stádas do chlárúcháin mar ‘Registration paid’. Ní chiallaíonn sé sin go bhfuil an tionóntacht cláraithe.
Déanfaimid seiceáil ar d’iarratas ar chlárú chun a chinntiú gur ceart atá an fhaisnéis a thug tú.
Léigh tuilleadh faoi stádas clárúcháin ar do chuntas clárúcháin agus sna litreacha deimhniúcháin thíos.
Tar éis dúinn do chlárú tionóntachta a phróiseáil agus tar éis duit an táille chlárúcháin a íoc, seolfaimid litir chugatsa agus chuig an tionónta/na tionóntaí atá liostaithe ar an gclárú chun a dheimhniú go bhfuil an tionóntacht cláraithe. Is féidir leat a roghnú an litir a fháil le ríomhphost nó tríd an bpost. Is féidir leat amharc uirthi sa rannán ‘Documents’ de do chuntas clárúcháin freisin.
De ghnáth, seolaimid an litir deimhniúcháin chuig tionóntaí tríd an bpost. Beidh uimhir RT (Tionóntacht Chláraithe) ar áireamh sa litir deimhniúcháin, arb aitheantóir uathúil do do chlárú í. Tá sí san fhormáid seo: RT-XXXX-XXXXXXXX.
Is féidir leat foirm RTB1 a íoslódáil agus í a sheoladh tríd an bpost nó le ríomhphost. Tá 9 gcuid ann agus is ionann an fhaisnéis agus an fhaisnéis atá sa phróiseas iarratais ar líne (féach thuas). Tá nótaí míniúcháin ar an bhfoirm pháipéir chun cabhrú leat d’iarratas a chomhlánú.
Comhlánaigh an fhoirm agus seol í:
Tríd an bpost chuig: An Bord um Thionóntachtaí Cónaithe, Bosca PO 47, Cloich na Coillte, Contae Chorcaí
Le ríomhphost chuig registrations@rtb.ie
Seol íocaíocht as an táille chlárúcháin in éineacht le foirm RTB1 chomhlánaithe uait. Is féidir leat íoc trí sheic, trí dhréacht bainc nó trí ordú poist, agus iad déanta iníoctha le RTB.
Ní mór do thiarnaí talún tionóntachtaí a athchlárú le RTB gach bliain, ar chomóradh lae dháta tosaithe na tionóntachta.
Is ionann an próiseas agus an próiseas a bhí ann nuair a chláraigh tú an tionóntacht ar dtús ach baineann sé le mionsonraí tionóntachta a dheimhniú agus a nuashonrú. Ní ann ach do dhornán difríochtaí, atá mínithe againn thíos.
Nuair a logálann tú isteach i do chuntas clárúcháin, cliceáil ar ‘Manage existing registrations’ ar an leathanach baile chun amharc ar thionóntachtaí atá dlite lena n-athnuachan. I gcás aon tionóntachtaí atá dlite lena gclárú, feicfidh tú ‘Pending Registration’ mar stádas sa cholún stádais.
Is féidir leat an t-amharc a scagadh trí úsáid a bhaint as na colúin ‘Next registration date’ nó ‘Status’ chun na tionóntachtaí atá dlite lena gclárú bliantúil a sheiceáil.
Cliceáil ar ‘Register’ in aice leis an tionóntacht is gá a athchlárú. Lean na 8 gcéim chéanna sa phróiseas chun tionóntacht a chlárú. Tá an fhaisnéis faoi do thionóntacht líonta isteach cheana féin ó do chlárú tionóntachta bunaidh.
Is féidir leat na mionsonraí a sheiceáil trí chliceáil ar an gcnaipe ‘View/Edit’.
Athbhreithnigh agus nuashonraigh mionsonraí na tionóntachta de réir mar is gá, lena n-áirítear aon athbhreithnithe cíosa.
